Жылнаама, 24-январь: Мындан 3 жыл мурун композитор Тарас Асанакунов 52 жаш курагында жүрөк оорусунан улам дүйнө салган

* Мындан 3 жыл мурун, 2013-жылы белгилүү композитор Тарас Асанакунов 52 жаш курагында жүрөк оорусунан улам дүйнө салган.
Тарас Асанакунов Айчүрөк Иманалиева аткарып жүргөн "Кызыл гүл", "Ак куу белең, айперим?", "Тоо булагым – арманым", Алина Жетигенованын аткаруусундагы "Кыздын сыры", "Арген" сыяктуу бир топ ырларды жаратып, кыргыз эстрадасынын өнүгүшүнө чоң салым кошкон. Өзүнүн 35 жылдык чыгармачылык жолунда баш-аягы 50гө жакын обондуу ырларды жаратканы белгилүү.

* Мындан 2 жыл мурун, 2014-жылы эл аралык издөөдө жүргөн 45 жаштагы Михаил Надель үй-бүлөсү менен Валь-Гарденде эс алып жүргөндө кармалган. Михаил Наделге 2010-жылы издөө жарыяланган. Ага "Азия универсал банктын" 35 миллион долларын мыйзамсыз ээлеп алган" деген айып тагылган.
1998-жылдан 2010-жылга чейин М.Надель банктын Директорлор кеңешинин төрагасы болгон. 2010-жылы банктын ишмердүүлүгүн текшерүүдөн кийин ал кыргыз соттору тарабынан “алдамчылык” жана “акчаларды мыйзамсыз алуу” фактылары боюнча күнөөлүү деп табылып, 16 жылга сыртынан соттолгон.

* Мындан 51 жыл мурун, 1965-жылы журналист, публицист, жазуучу, сүрөтчү, коомдук ишмер, мыйзамчы, Англиянын эки жолку өкмөт башчысы, адабият тармагында "Нобель" сыйлыгынын ээси Уинстон Леонард Спенсер Черчилль көз жумган.
Уинстон Черчилль 1874-жылы 30-ноябрда Англиянын Бленхейм ак сарайында туулган.
Тарыхта Черчилль өтө оор кырдаалда - Экинчи дүйнөлүк согуш маалында (1940-1945-жылдары) Улуу Британиянын өкмөт башчысы болуп, фашисттик Германияга каршы күрөштү эл аралык деңгээлде уюштурууга салым кошкон мамлекеттик ишмер катары өзгөчө орун ээлеп калган.

* Мындан 5 жыл мурун, 2011-жылы Москва шаарындагы Домодедово аэропортунда террорчу өзүн жардырып жиберген. Чеченстандагы террордук кыймылдын башчысы Доку Умаровдун буйругу менен жасалган бул терактта 37 киши өмүрү менен коштошуп, 170 адам ар кандай жаракат алган.

24-январда Кыргыз Республикасында жана дүйнөдө орун алган окуялар тууралуу кененирээк бул жактан окуй аласыздар.

Автор: Гүлзат Мамытканова