Жылнаама, 17-февраль: Мындан 83 жыл мурун төкмө акын, комузчу Токтогул Сатылганов каза болгон

* Мындан 83 жыл мурун, 1933-жылы кыргыз улуттук адабиятынын башында тургандардын бири, демократ акын Токтогул Сатылганов 69 жаш курагында туулган жеринде дүйнөдөн кайткан.

Төкмө акын, обончу, комузчу, аткаруучу, куудул Токтогул Сатылганов 1864-жылы Ош облусунун Кетмен-Төбөсүндө туулган. 13 жашынан эле айыл арасында ырдай баштаган. Ырлары ар кандай тематикада болгон. Алгач "Алымкан", "Чакырбай сүткор", "Беш каман", "Эшен-калпа" сыяктуу көптөгөн ырларды аткарган. Кийинчерээк акын "Эмне кызык?", "Гүлдөп ал", "Санат", "Терме" сыяктуу нускалуу ырларды ырдаган. Бай-манаптарды, эшен-калпаларды сындаган көп ырлары бар.

1898-жылы Сибирге сүргүнгө айдалган. Анда жүргөндө "Туткун ыры", "Ушундайбы сурагың?", "Качып келе жатканда" жана башка ырларды чыгарган. 1903-жылы сүргүндөн келгенден кийин "Эңсеген элим аманбы?", "Апакем, аман барсыңбы?" жана башка ырларды жараткан. Октябрь революциясынан кийин жаңы түзүлүштү даңазалаган.

Токтогул - айтыш жанрындагы ырлардын чоң устаты. "Манас" эпосун, кенже эпосторду да айткан.

* Мындан 53 жыл мурун, 1963-жылы атактуу америкалык баскетболчу Майкл Жордан Бруклинде туулган.
УБАда (Улуттук баскетбол ассоциация) чабуулчу-коргоочу позициясында ойногон. 1980-1990-жылдары Жордан УБА баскетболунун жайылышына чоң салымын кошкон. 1982-1984-жылдары Түндүк Каролина университетинин командасында ойноп, Улуттук студенттер спортунун ассоциациясынын чемпиону болгон. 1984-жылы "Чикаго Буллз" командасына кошулган.
Укмуштуудай секириктери үчүн аны "Air Jordan" деп аташкан. 1991-жылы "Буллз" командасы менен УБАда өзүнүн алгачкы чемпиондугун утуп, 1992-1993-жылдары ийгилигин кайталаган.

* Мындан 50 жыл мурун, 1966-жылы Москванын Шереметьево аэропортунан учарда Ту-114 учагы кырсыкка кабылып, 21 адам каза болгон. 14-февралда Москвада калың кар жаап, аэропорт карга көмүлүп калган. 16-февралдан 17-февралга караган түнү аэропортту туман каптап, көрүү начар болуп, кар эрип, учуучу жол тайгак болгон. Учактын командири аба ырайына карабай учууну туура көргөн. Диспетчер адашып ага учууга уруксат берген. Учак жерден көтөрүлөрдө сол жана оң шассилери үйүлгөн карга тийип, учакты солго бурган, сол дөңгөлөк учуучу жолдун чырагына тийип, учактын ылдамдыгы төмөндөп, оң дөңгөлөгүнө күч келген. Учак оң капталына кулап, көңтөрүлүп кеткен.

* Мындан 2 жыл мурун, 2014-жылы аба ырайына байланыштуу Сочиде Кышкы Олимпиада оюндарынын катар тартиби өзгөргөн. Сочини 17-февралда туман каптап, мырзалардын лыжа менен 15 чакырымга жарышуусу, биатлон жана мырзалардын сноуборд жарышы токтотулган.