Москва шаарынын метрополитенинде мигрантка бычак сайган адам изделүүдө

Москва шаарынын метрополитенинде мигрантты бычактап кеткен адам изделип жатканын Орусиянын маалымат каражаттары Москванын полиция кызматына шилтеме берүү менен жазып чыгышты.

Маалыматта айтылгандай, 13-февралда “Добрынинская” станциясында белгисиз адам 23 жаштагы тажик улутундагы жаранды поездден чыгып келе жатканда бычак менен сайып кеткен. Канжалап жатканын байкагандар “Тез жардам” кызматын чакырып, ага жардам көрсөтүшкөн.

Ал эми 14-февралда да "Перово" станциясынын жанында 29 жана 31 жаштагы эки кыргыз жаранын белгисиз адам бычактап кеткен. Оор жаракаттардан улам алардын бири окуя болгон жерден көз жумган. Экинчиси оор абалда жандандыруу бөлүмүнө жеткирилген, ага тиешелүү медициналык жардам көрсөтүлгөн.

Кылмышка шектүү окуя болгон жерден качып кеткен, бирок көп убакыт өтпөй ал полиция кызматкерлери тарабынан табылган. Учурда бул факт боюнча кылмыш иши козголуп, иликтөө жүрүүдө.

Автор: Алина Токтакунова