Ош шаарындагы каралбай калган жерлерди "Тазалык" ишканасы тазалоого милдеттүү

Ош шаардык кеңешинин депутаттары 2016-жылга карата бюджетти бекитишти. Ага ылайык, "Тазалык" муниципалдык ишканасына 35 миллион сом бөлүндү. Бул тууралуу Ош шаардык мэриясынын басма сөз кызматы бүгүн, 3-мартта билдирди.

Маалыматка ылайык, бул өткөн жылга салыштырмалуу үч эсе көп. Бюджеттин мындай чукул өсүүсү төмөнкү муктаждык менен түшүндүрүлөт: таштанды полигондорун камсыздоо, шаардын борбордук бөлүктөрүн гана эмес, башка короо аймактарын да тазалоо үчүн кошумча адам ресурстары менен камсыз кылуу, шаардын түштүк-чыгыш жана батыш аймагын тазалоо, шаарда вирустарды жайылтпоо жана тазалыкты көзөмөлгө алууну колдоо.

"Тазалык" ишканасынын башчысы Талантбек Капаровдун айтымында, ишкананын бюджетин көбөйтүү калктын муктаждыгынан улам келип чыккан. "2015-жылы биздин жумуш боюнча изилдөө жүргүзүлгөн. Анда шаар тургундарынан бир топ эскертүүлөр, сунуштар түшкөн. Алардын баарын 2016-жылдагы шаардын бюджетин түзүүдө эске алып, жашоочулардын сунушун ишке ашыруу үчүн каражат бөлдүк",- дейт Талантбек Капаров.

Эми бул жылдагы 12 ай ичинде "Тазалык" муниципалдык ишканасы каралбай келген аймактарды да тазалоого милдеттүү болот. Бул үчүн шаардык бюджеттин эсебинен ишканадагы жумушчулардын саны 74 кызматкерге көбөйөт.

Автор: Турсунай Алымкулова