Өзгөн районунда өзүнүн уулун атып өлтүрүп, эки небересин жарадар кылган жаран 18 жылга эркинен ажыратылды

Уулун атып өлтүргөн К.А.

Өзгөн районуна караштуу Зергер айылында өзүнүн уулун атып өлтүрүп, эки небересин жарадар кылган жаран 18 жылга эркинен ажыратылды. Бул тууралуу бүгүн, 10-мартта SUPER.KG порталына Өзгөн районунун прокурорунун орун басары Эмил Мурзаибрагимов билдирди.

Маалыматка ылайык, факт боюнча "адам өлтүрүү" беренеси менен кылмыш иши козголгон. Кылмыш ишинин тергөө амалдары 30-январь күнү аяктап, райондук сотко жөнөтүлгөн.

"Өзгөн райондук соту 2016-жылдын 15-февралында "адам өлтүрүү" беренеси менен айыпталып жаткан 47 жаштагы К.А. аттуу жарандын ишин карап, аны күнөөлүү деп тапты. Айыпталуучу 18 жылга эркинен ажыратылып, жазасын күчөтүлгөн тартиптеги абакта өтөө өкүмүн чыгарды",- деди Э.Мурзаибрагимов.

Айта кетсек, 2015-жылы 30-ноябрь күнү Зергер айыл аймагынын Жаңы-Айыл айылынын 47 жаштагы тургуну К.А. менен 28 жаштагы уулу К.Ж. экөөнүн ортосунда уруш чыккан. Уулу үй-бүлөсүн алып кетейин деп 2 баласы менен унаага отурган учурда атасы жанына келип ок атуучу курал менен 2 жолу атып салган. Оор жаракаттан улам уулу окуя болгон жерден каза тапкан. Ал эми маркумдун 5 жаштагы уулу менен 2 жаштагы кызы жаракат алышкан.

Автор: Мальвина Уметбекова