Бишкек-Торугарт унаа жолунда айдоочу 2 жөө жүрүүчүнү сүзүп кетип, алар каза болушту

Бишкек-Торугарт унаа жолунда айдоочу 2 жөө жүрүүчүнү сүзүп кетип, алар каза табышты. Бул тууралуу бүгүн, 10-мартта Чүй ОИИББинин басма сөз кызматынан билдиришти.

Маалым болгондой, окуя 9-мартта саат 22:15 чамасында Бишкек-Торугарт унаа жолунун 59-чакырымында орун алган. Анда Фольксваген Б-4 үлгүсүндөгү унааны башкарган айдоочу жолдон өтүп бараткан 47 жаштагы А.К. жана 62 жаштагы К.И. аттуу эки жөө жүрүүчүнү сүзүп, окуя болгон жерден качып кеткен. Оор жаракаттардан улам жабырлануучулар ошол жерден каза болуп калышкан.

Жүргүзүлгөн ыкчам аракеттердин алкагында кылмышка шектүү катары Ивановка айылынын 47 жаштагы Ч.И. аттуу тургуну кармалган. Учурда бул факт боюнча тиешелүү экспертизалар дайындалып, иликтөө иштери жүрүүдө.

Автор: Алина Токтакунова