Жылнаама, 14-март: Мындан 36 жыл мурун ырчы Гүлзада Рыскулова төрөлгөн

* Мындан 36 жыл мурун, 1980-жылы ырчы Гүлзада Рыскулова Ош облусундагы Өзгөн районунун Чымбай деген айылында туулуп-өскөн. Ош мамлекеттик педагогикалык институтунун музыкалык бөлүмүн аяктаган. Гүлзада Рыскулова алгачкы эле ырдап чыккан "Мен кыргыздын кызымын" аттуу ыры менен элдин эсинде калган. Кийин кыргыздын нукура күү, дастандарын дүйнөгө тааныткан "Ордо-Сахна" фольклордук-этнографиялык тобунда эмгектене баштаган.

* Мындан 137 жыл мурун, 1879-жылы немис физик-теоретиги, “Нобель” сыйлыгынын лауреаты Альберт Эйнштейн Германиядагы Дунайдын сол жээгиндеги Ульм шаарында туулган. Окумуштуу дүйнөнүн көптөгөн академиясынын жана илимий коомдорунун мүчөсү, "Нобель" сыйлыгынын лауреаты (1921), СССР Илимдер академиясынын ардактуу мүчөсү (1927) болгон. Ал 1955-жылы дүйнөдөн кайткан.

* Мындан 51 жыл мурун, 1965-жылы белгилүү индиялык актёр, продюсер, сценарист, режиссёр жана алып баруучу Аамир Хан Бомбейде төрөлгөн. "Найти друг друга", "Приговор", "Любовь, любовь, любовь", "Сердцу не прикажешь", "Хочу жениться на дочери миллионера", "Мятежная душа" сыяктуу тасмаларда мыкты ролдорду жараткан Аамир Хан бир катар улуттук жана эл аралык сыйлыктардын ээси болгон.

* Мындан 37 жыл мурун, 1979-жылы орусиялык алып баруучу, “Комеди клаб” теледолбоорунун катышуучусу, актёр Павел Воля Орусиянын Пенза шаарында туулган. Ал 2001-жылы Пенза мамлекеттик педагогикалык университетин орус тили жана адабияты мугалими адистиги боюнча аяктаган. Андан соң дароо Москвага сапар алып, ал жактан алгач курулушта иштеген. Кийин ди-джей, алып баруучу болуп чыгармачылык жолун уланткан.