Акын, котормочу Турар Кожомбердиевдин 75 жылдыгы туулган айылында белгиленди

12-мартта Чүй облусунун Жайыл районунун Сары-Булак айылында акын, котормочу Турар Кожомбердиевдин 75 жылдыгына арналган марафон орун алды. Акындын кызы Нургүл Кожомбердиева билдиргендей, иш-чара анын айылдаштары тарабынан уюштурулду.

Маалым болгондой, анда 3 боз үй тигилип, биринде көргөзмө уюштурулуп, эки боз үйдө конокторго дасторкон жайылды. Иш-чарага айыл тургундары, Кыргыз Эл жазуучулары Төлөгөн Мамеев, Мелис Абакиров, Гүлсайра Момунова, драматург Меңди Мамазаирова, балдар акыны Жылдыз Акаева, акындыр Надырбек Алымбеков, Бүбайша Арстанбекова жана башкалар катышты.

Иш-чаранын алкагында уюштурулган марафонго 500дөн ашык адам катышты.

Кошумчалай кетсек, Турар Кожомбердиев балдар үчүн жазылган чыгармалары, китептери менен таанымал. Ал 1941-жылы туулуп, 1989-жылы көз жумган. Акындын айрым ырлары орус, украин, казак, беларусь, молдован, азербайжан, литва, латыш, өзбек, татар, хакас жана француз, англис тилдерине которулган. Буга катар анын 70тен ашуун ырына обон жазылган.

Автор: Максат Кудайбердиев
Фото: Нургүл Кожомбердиева