Нооруз майрамына байланыштуу борбордогу айрым көчөлөрдө унаа кыймылына чектөө киргизилет

Бишкекте 21-Март - Нооруз майрамына карата айрым көчөлөрдө саат 09:00дөн баштап майрамдык иш-чаралар аяктагыча убактылуу чектөө киргизилет. Бул тууралуу Жол-кайгуул кызматынан билдиришти.

Маалыматка ылайык, Эркиндик бульварынан Тоголок Молдо көчөсүнө чейинки Чүй кең көчөсүндөгү жол бөлүгү, Эркиндик бульварынан Панфилов көчөсүнө чейинки бөлүктөгү Абдумомунов көчөсү, ошондой эле “Аккула” ат майданы жайгашкан Лев Толстой көчөсүнөн баштап Гагарин көчөсүнө чейинки бөлүктөгү Термечиков көчөсүндөгү жол кыймылына убактылуу чектөө киргизилет. Андан сырткары ипподромдо ат оюндары уюштурулмакчы.

Автор: Мальвина Уметбекова