Экс-чиновник Юруслан Тойчубековдун уулу камакка алынды

Кылмышка шектелип издөөдө жүргөн экс-чиновник Юруслан Тойчубековдун уулу Тимур Тойчубеков тергөө бүткүчө камакка алынды. Мындай чечимди 18-мартта Бишкектин Биринчи Май райондук соту чыгарып, айыпталуучу №1-СИЗОго жеткирилди.

Тимур Тойчубеков "орусиялык банктардын биринен мыйзамсыз ири суммада акча алган" деп айыпталууда.

Маалыматка таянсак, компаниялардын биринин жетекчиси Тимур Тойчубеков башка компания менен биргеликте жылдык 12 пайыздык үстөгү менен 500 миң доллар насыя алууда орусиялык банктардын бирине жалган маалыматтарды көрсөтүп, өзүнүн компаниясына караштуу жер тилкеси менен акцияларын күрөөгө койгон. Банктан тийиштүү сумманы алары менен эки компаниянын башчысы (Т.Тойчубеков менен шериги Ч.Т.) "насыя боюнча келишим жараксыз" деген Бишкектин райондор аралык сотунун чечимин жасалмалап, күрөөгө коюлган мүлктү үчүнчү жакка сатып жиберишкен.

Учурда тергөө иштери жүрүүдө.

Кылмышка шектүүнүн атасы, Каржы рыногун жөнгө салуу жана көзөмөлдөө мамлекеттик кызматынын мурунку башчысы Юруслан Тойчубеков "кызматта турганда компаниялардын бирине мыйзамсыз күбөлүк берген жана пайдадан түшүүчү 10 пайыздык төлөмдөн бошоткон" деп айыпталып, учурда эл аралык издөөдө жүрөт.

Автор: Автандил Добулбеков