Кара-Суу райондук салык кызматынын кызматкери пара талап кылып кармалды

Кара-Суу районунун Мамлекеттик салык кызматынын кызматкери "пара талап кылган" деген шек менен кармалды. Бул тууралуу бүгүн, 13-майда ИИМдин басма сөз кызматынан билдиришти.

Маалым болгондой,11-майда милиция кызматкерлерине арыз менен аталган облустун О. аттуу тургуну кайрылган. Ал Кара-Суу районундагы аталган кызматтын кызматкери жеке ишкердигин токтотуу үчүн пара талап кылганын билдирген. Териштирүү иштеринин алкагында кызматкер иш кагаздарын жоюп салуу үчүн толтурулган документке 2 миң сом акча талап кылганын аныкташкан. Бул факт боюнча “опузалап пара талап кылуу” беренеси менен кылмыш иши козголуп, кылмышка шектүү убактылуу кармоочу жайга киргизилди. Учурда иликтөө иштери жүрүүдө.

Автор: Алина Токтакунова