Жалал-Абадда катуу жааган жамгырдын кесепетинен сел 32 баш койду агызып кетти

Жалал-Абадда катуу жааган жамгырдын кесепетинен 1 электр мамысы жараксыз абалга келип, 32 баш койду сел агызып кетти. Бул тууралуу бүгүн, 16-майда Өзгөчө кырдаалдар министрлигинин басма сөз кызматынан билдиришти.

Маалым болгондой, 15-май күнү саат 12:00 чамасында Базар-Коргон районуна караштуу Арстанбап айылындагы Бабаш-Ата тоосунда жааган катуу жаандын кесепетинен 170 метрге жакын ички чарбалык жол бузулуп, 3 кожолуктун короолоруна сел суулары кирген. 1 ички чарбалык көпүрө кооптуу абалга, 1 электр мамысы жараксыз абалга келген. Ошондой эле Токтогул районунун Өзгөрүш айыл аймагында нөшөрлөп жааган жамгырдын кесепетинен 15-майда түнкү саат 2:00 чамасында Тактык жайлоосунда сел жүрүп, 32 баш койду агызып кетти.

Жарандык коргоо комиссиясы сел болгон жерге барып тактоо иштерин жүргүзүүдө. Айыл аймактагы ветеринардык кызматкерлер тарабынан өлгөн койлор коопсуз жерге көмүлгөн.

Автор: Алина Токтакунова