Жогорку Нарын ГЭСтер каскадын курууну пландаган “РусГидронун” мурдагы жетекчиси алдамчылыкка шектелип кармалды

Орусияда Жогорку Нарын ГЭСтер каскадын курууну пландаган “РусГидро” компаниясынын мурдагы жетекчиси Евгений Дод алдамчылыкка шектелип кармалды. Бул тууралуу бүгүн, 23-июнда орусиялык басылмалар жазып чыгышты.

Орусиянын Тергөө комитетинин маалыматына караганда, 2013-жылы Евгений Додго жана “РусГидронун” топ-менеджерлерине чоң суммадагы сый акы мыйзамсыз чегерилген. “РусГидронун” уставына ылайык, эгерде ишкана жылды чоң суммадагы пайда менен бүтүрсө гана сый акы берилиш керек эле. Бирок 2013-жылы Загорский ГАЭС-2нин курулушундагы авария ишканага чоң суммадагы чыгымдарды алып келген.

Айта кетсек, “РусГидро” 2012-жылы Кыргыз Республикасында Жогорку Нарын ГЭСтер каскадын курууну пландаган. 2013-жылы курулуш иштери башталган болчу. Бирок үстүбүздөгү жылдын башында Жогорку Кеңеш 2012-жылдын 20-сентябрында кол коюлган Камбар-Ата-1 ГЭСин жана Жогорку Нарын ГЭСтер каскаддарын куруу жөнүндөгү келишимди жокко чыгарган.

Автор: Бекжан Рыскулов