Ангела Меркель Алмазбек Атамбаевге "силердин аймакта кырдаал дайыма эле жөнөкөй боло бербейт" деп айтты

Германиянын канцлери Ангела Меркель президент Алмазбек Атамбаев менен жолугушууда "силердин аймакта кырдаал дайыма эле жөнөкөй боло бербейт" деп айтты. Ангела Меркель Кыргыз жерине келишинин негизги максатын белгиледи.

“Мен азыр эле Кыргыз техникалык университетинде болуп, студенттер менен жолуктум. Биз саламаттык сактоо чөйрөсүн жана башка тармактарды насыялоо маселесин талкууладык. Силердин экономиканы алга жылдырсак деген жакшы максатыңар бар экенин билебиз. Бул оңой-олтоң иш эмес. Силер демократиялык жолду тандап алдыңар, бул чечим да жеңил эле кабыл алына калган чечим эмес. Силердин аймакта кырдаал дайыма эле жөнөкөй боло бербейт. Ошого карабастан, силер өнүгүүнүн демократиялык жолун тандадыңар. Менин визитимдин максаты – мындан ары кандайча кызматташабыз, биз силерге кандай жардам бере алабыз, ушул маселелерди силер менен бирге талкуулоо. Бүгүн жаш, эстүү кыргыз студенттери менен жолугуу учурунда алардын ачыктыгын жана активдүүлүгүн көрүп, жаштардын келечеги кең болушун тиледим", - деди Меркель.