Жаратылышты коргоодогу мыйзамсыздык боюнча 2 жылда 180 материал сот жана укук коргоо органдарына жөнөтүлгөн

Акыркы эки жылда Айлана-чөйрөнү коргоо жана токой чарбасы агенттиги укук коргоо жана сот органдарына 19 миллион сом өндүрүү боюнча 180ден ашык материал жөнөткөн. Маалымат 2-августта өкмөттө айлана-чөйрөнү коргоо жана аңчылык тармагындагы мыйзам бузуулар талкууланган кеңешмеде айтылды.

Жыйынга катышкан биринчи вице-премьер-министр Мухаммедкалый Абылгазиев жаратылыш ресурстарын эффективдүү пайдалануу өлкө экономикасын өнүктүрүүнүн негизи экенин белгилеп: "Жаратылыш байлыктарын жемиштүү пайдалануу флора менен фаунаны сактоого түздөн-түз таасир этет жана элдин жашоосунун жакшырышына мүмкүнчүлүк түзөт. Экономиканы өнүктүрүү жана өндүрүш кубаттуулугун күчөтүүгө аракет кылуу менен бирге курчап турган чөйрөгө аяр мамиле кылууга өзгөчө көңүл буруу зарыл", - деди.

Тармакта мыйзамдуулукту сактоо, браконьерлик фактыларын, дарактарды мыйзамсыз кыюу жана башка мыйзам бузууларды жоюу керектигин кошумчалады. Жакында аталган маселе өкмөт жыйынында каралары белгилүү болду.

Автор: Автандил Добулбеков