Ош шаардык мусулмандар казыяты өрттөн жабыркаган 10 үй-бүлөгө 120 миң сом жардам көрсөттү

Ош шаардык мусулмандар казыяты өрттөн жабыркаган үй-бүлөлөргө 120 миң сом жардам көрсөттү. Бул тууралуу бүгүн, 16-августта муфтияттан билдиришти.

"Ош облусундагы Кара-Суу районунун Кызыл-Кыштак айыл өкмөтүнүн Новаи көчөсүндө өрттөн жабыркаган 10 үй-бүлөнүн жашоочуларына 120 миң сом жардам көрсөтүлдү", - деп айтылат маалыматта.

Кайрымдуулук иш-чарасына Ош шаарынын казысы Убайдулла Сарыбаев катышты. Шаар казысы өрттөн жабыркаган тургундарды сабырдуу болууга чакырып, мындан сырткары тилсиз жоодон сактануу үчүн үй жумуштарында кылдат болууга үндөдү.

Эске салсак, 6-август күнү Кызыл-Кыштак айылындагы бир нече үйдөн өрт чыккан. Өрттүн кесепетинен 3 турак жай толугу менен күйүп, 5 турак жайдын чатырлары өрттөнүп кеткен.

Автор: Акназар Сулайманкулов
Фото: Муфтияттын басма сөз кызматы