"Медет Садыркуловду өлтүрдү" деп соттолгон жарандын агасы баңгизат менен кармалды

"Медет Садыркуловду өлтүрдү" деп соттолгон жарандын агасы баңгизат менен кармалды. Бул тууралуу бүгүн, 13-сентябрда Баңгизаттарды көзөмөлдөө боюнча мамлекеттик кызматы билдирди.

Маалыматка караганда, 10-сентябрь күнү Баңгизаттарды көзөмөлдөө боюнча мамлекеттик кызматынын өкүлдөрү тарабынан 1980-жылы туулган С.А. аттуу жарандын жашаган жери текшерүүгө алынган. Анын жыйынтыгында сарайдан 7 килограмм 614 грамм гашиш табылган.

Айта кетсек, Медет Садыркулов 2007-жылдын 16-апрелинен 2009-жылдын 8-январына чейин президенттин администрация жетекчиси кызматында иштеп келген. 2009-жылдын 8-январында өз каалоосу менен отставкага кеткен. Ал эми 2009-жылы 13-мартта өлтүрүлгөн. Бул кылмышка шектелгендердин бири Рустам Сайдиев сыртынан соттолгон. Учурда ал эл аралык издөөдө. Баңгизат менен кармалган С.А. Сайдиевдин бир тууган агасы.

Автор: Бекжан Рыскулов