"Эйр Манас” компаниясы Бишкек-Кашгар-Бишкек туруктуу аба каттамын ачты

19-сентябрда Кытай жана Кыргыз Республикасынын ортосундагы соода-экономикалык кызматташууну өнүктүрүү жана учуу географиясын кеңейтүү максатында “Эйр Манас” компаниясы Бишкек-Кашгар-Бишкек туруктуу аба каттамын ачты.

Бишкек-Кашгар-Бишкек туруктуу аба каттамы 189 орундугу бар EX-37802 номурундагы ыңгайлуу Boeing 737-800 учагы аркылуу жумасына эки жолу аткарылат. Аталган учак NG (Next Generation) жаңы муундагы, үнөмдүү жана экологиялык таза модель болуп саналат. Мындай учактан Кыргыз Республикасында экөө болсо, алар “Эйр Манас” компаниясынын карамагында.

Эске салсак, EX-37802 номурундагы Boeing 737-800 учагына "Эйр Манас" компаниясы СССРдин Эл артисти, кыргыз балеринасы Бүбүсара Бейшеналиеванын ысымын ыйгарган. Кашгар шаары Кытайдын батыш аймагында жайгашып, Синьцзян-Уйгур автономдук аймагынын чоң шаарларынын катарын толуктайт. Туруктуу каттамдарды аталган шаардын “Kashi” аэропорту кабыл алат. “Эйр Манас” компаниясынын Бишкек-Кашгар-Бишкек каттамы бул аэропорт үчүн биринчи эл аралык каттам болуп, мунун урматына майрамдык кече болуп өттү.

Маалымат үчүн: Бишкек-Кашгар-Бишкек каттамы дүйшөмбү жана жума күндөрү аткарылып, жалпы учуу убактысы үчүн Бишкек-Кашгар аралыгына 2 саат жана Кашгар-Бишкек ортосуна 2 саат 10 мүнөттү сарптайт.

Учуу - ар бир жарандын укугу!

Автор: Аскат Сабыров
Фото: "Эйр Манас”