МЕДИА-ПОРТАЛ: "Жигиттер" ырынын клибине кара терилүү жигит кокусунан тартылып калган" дейт Өктөм Сапар уулу

Өктөм Сапар уулунун "Жигиттер" ырынын клиби "Медиа-портал" бөлүмүндөгү позитивдүү клиптердин катарын толуктайт. Чыгарма "Тамашоу" долбоорунун "No name" командасындагы оюнчулар Мурат Жалиев, Кадыр Жарматов менен биргеликте аткарылган. Өктөм Сапар уулу клип Ош шаарында тартылып, жергиликтүү тургундар тартуу учурунда колдоосун аябаганын айтат.

"Клип Ош шаарында тартылган. Аталган шаар Бишкекке салыштырмалуу кичинекей болгондуктан, эч ким клип тартпаган жайларды көпкө издедик. Клиптин идеясы боюнча "тамашоучу" жигиттер чихуахуа породасындагы күчүктөрдү колдоруна кармап алып ырдашы керек болчу. Андай күчүктөрдү таппай, бирөө менде бар дегенинен алдырсак, чоң эле ит экен. Аны колдоруна алып бийлеген сайын тиги ит бышылдап калып жатты", - дейт Ө.Сапар уулу.

Ал эми клиптеги кара терилүү жигит кокусунан тартылып калганын айтат.

"Оштогу эс алуучу жайлардын бирине кирсек, кара терилүү жигит ошол жерде бийчи болуп иштейт экен. Анан аны кошуп тартып койгонбуз. Тартуу учурунда Ош шаарынын жашоочулары бизге колдоо көрсөтүп, колдорунан келген жардамдарын берип жатышты", - деп билдирди ырчы.

Өктөм Сапар уулу "Жигиттер" ырынын клибин бул жерден көрүңүз.

Автор: Турсунай Алымкулова