ЖЫЛНААМА, 20-ОКТЯБРЬ: 5 жыл мурун Ливиянын президенти Муаммар Каддафи өлтүрүлгөн

2011-жылдын 20-октябрында Ливиянын мамлекет башчысы, Муаммар Каддафи Өткөөл улуттук кеңештин күчтөрү тарабынан колго түшүрүлүп, өлтүрүлгөн.

Ливиянын саясий жана аскерий ишмери Муаммар Каддафи 1942-жылы 7-июнда Сирт шаарынан 30 чакырым аралыкта жайгашкан бедуиндин (көчмөн) алачыгында төрөлгөн. Анын толук аты-жөнү -Муаммар бен Мухаммад Абу Меньяр Абдель Салам бен Хамид аль-Каддафи.

9 жашында башталгыч, анан Себха шаарындагы орто мектепте окуп, үй-бүлөсүндө эң биринчилерден болуп орто билим алган. 16 жашында ошол учурдагы падыша Идрис I`нин бийлигин кулатуу үчүн жаштардын арасында жашыруун уюм түзгөн. Мындан улам ал мектептен чыгарылган. 1964-жылы Ливия университетинде юристтик адистикке ээ болгон. Окуп жүргөндө университеттин Аскер академиясынын кечки курсуна угуучу катары катышкан. Ал окууда дайыма үлгүлүү окуучу, курсант экенин көрсөткөн. 1965-жылы аскерге чакыртылып, кийинчерээк британиялык аскердик колледжде 10 ай бронетанка ишин окуган.

Падыша Идрис чет өлкөдө жүргөндө 1969-жылы 1-сентябрда жаш офицерлер арасында кутум уюштуруп, Триполиде хан сарайын, өкмөттүк мекемелерди, теле, радио имараттарын басып алып, Ливияны республика деп жарыялаган. Каддафи козголоңчулардын лидери жарыяланып, Революциялык башкаруу кеңешинин жана Жогорку башкы командачы постунун жетекчилигин ээлеген. Ал 1969-жылдан 2011-жылга чейин өлкөнүн башында турган.

20-октябрга карата жылнаама.

Автор: Бекжан Рыскулов