ЖЫЛНААМА, 28-ОКТЯБРЬ: Ырчы Кутман Жолдошев бүгүн 50 жашка толду

Ырчы Кутман Жолдошев

Кутман Жолдошев үй-бүлөсү менен

Бүгүн, 28-октябрда "Кутмандуу жерим", "Кантың бар", "Ушундай беле бешене?" жана башка белгилүү ырлардын аткаруучусу, ырчы Кутман Жолдошев эр ортону 50 жашын белгилеп жатат. Ырчыны куттуктап, өздүк майрамын кандай белгилеп жатканын билүү үчүн байланышка чыктык.

"Каалоо-тилектер үчүн рахмат! Азыр үй-бүлөм менен бүгүнкү майрамды чакан белгилеп коюу үчүн тамактануучу жайга чогулдук. Маанай эң сонун. Бул жерден чыгып, Улуттук филармонияга репетицияга барам. Быйыл филармониянын 80 жылдыгына карата даярдыктар кызуу жүрүп жатат. Ал жакта туулган күндү белгилөөгө убакыт жок, аз эле убакыт калгандыктан, кечки саат 6дан баштап түнкү 12ге чейин репетиция болот", - деди ырчы.

Белгилей кетсек, ырчы Өзгөн районундагы Кызыл-Сеңир айылында туулган. 1984-жылы айылындагы орто мектепти бүтүрүп, 1985-1987-жылдары Советтик Армиянын катарында кызмат өтөгөн.

Болочок ырчы алгач сүрөтчү болууну эңсеп, Оштогу Гапар Айтиев атындагы сүрөт мектебин бүтүргөн. 1989-жылы Өзгөндөгү Маданият үйүнө ишке орношуп, ал жерде үч жыл иштеген. Ал жактан комуз черткенди, аккордеон тартканды үйрөнгөн. Жакшы иштегендигинен Маданият үйүнүн жамааты Жалал-Абаддагы Б.Алыкулов атындагы Маданият техникумуна окууга жолдомо беришип, аны 1994-жылы бүтүргөн. Андан соң облустагы Токтосун Тыныбеков атындагы филармонияда оркестрдин ырчысы болуп иштеген. 1996-жылы обончу Арзыбек Бедияров менен таанышып, обончунун ырларын аткарып калган. Алардын бирге иштешүүсүнөн "Кутмандуу жерим", "Көргөндө адатым бар күлүп коймой", "Сүйүүңдү сүртүп кеттиң жүрөгүмө" аттуу обондор жаралып, угармандарга тартууланган.

28-октябрдын жылнаамасы.

Автор: Турсунай Алымкулова
Фото: "Супер-Инфо" гезитинин <br> архивинен алынды