Өлкөдө 13 миң гектардан ашуун жер трансформация боло элек

Өлкөдө 13 миң гектар жерге турак жай салынып, бирок трансформация болбой жатат. Бул тууралуу бүгүн, 24-ноябрда SUPER.KG порталына Трансформация кыймылынын башкы координатору Бекназар Айталиев билдирди.

"2013-жылы жерди трансформация кылуу аракетин көрүп атайын кыймыл түзгөнбүз. Ошол убактан бери жерин трансформация кыла албай жүргөн адамдарды каттай баштадык. Бүгүнкү күндө республика боюнча 13 398 гектар жер трансформацияланбай, турак жайлар салынып калган. Мында 42 204 үй-бүлө жашап жатат. Трансформация маселесине тагдыры байланып тургандардын 90 пайызы жаш үй-бүлөлөр болууда. Маселесин чечүү боюнча ушул күнгө чейин карапайым эл 8 жолу митингге чыккан", - деп билдирди Айталиев.

Маалыматка ылайык, трансформациялоо иштерин экс-премьер-министр Темир Сариев, Өмүрбек Бабанов жана учурдагы өкмөт башчы Сооронбай Жээнбеков чече албай келет. Белгилүү болгондой, буга чейин Жогорку Кеңештин 6-чакырылышынын депутаттары трансформация маселесин парламентте карап, 1-окууда жактырышкан.

Эске салсак, 2009-жылдын 31-июлунда жерди трансформациялоого мораторий жарыяланган.

Автор: Акназар Сулайманкулов
Фото: Интернеттен алынды