Жаңы жылдык белектерге кайсы ишкана канча миллион коротууга даяр?

Жаңы жыл майрамына чейин 34 күн калды. Кээ бир мамлекеттик ишканаларда ал майрамга даярдык ноябрь айынын башында башталган. Ошол маалда мамлекеттик сатып алуулар порталында бир нече ишканалар тарабынан жаңы жылдык белектерге тендерлер жарыялана баштаган.

Алгачкылардан болуп "Эл аралык "Манас" ачык акционердик коому 2 миллион 42 миң сомго 3-ноябрда жарыялап, 24-ноябрда арыздарды кабыл алууну токтоткон.

Ал эми "Түндүк электр" ачык акционердик коому өлкө боюнча эң көп каражатка белек сатып алууну пландоодо. Алар 25-ноябрь күнү 2 миллион 502 500 сомдук тендерде жаңы жылдык белектерди сатып алышарын жарыялашкан.

Президенттин жана Кыргыз Республикасынын Өкмөтүнүн Иш башкармалыгы жаңы жылдык белектерди 1 миллион 667 миңге сатып аларын 15-ноябрда жарыялап, 22-ноябрда жыйынтыктаган.

"Альфа Телеком" жабык акционердик коому 780 миң сомго, Мамлекеттик бажы кызматы 165 130 сомго белектерди сатып алышары маалым болду.

Автор: Үмүт Абдраимова