Депутат: "Парламентте бири-бирибиз менен кырылышып, элдин ишенимин жоготтук"

Жогорку Кеңештин 14-декабрдагы жыйынында жергиликтүү кеңешке шайлоо менен референдумдун жыйынтыктары талкууланууда. Анын жүрүшүндө депутаттар шайлоочулардын тизмеде өздөрүн таппаганы, жабдуулардын бузулуп жатканы боюнча нааразычылыктарын айтышты.

Депутат Эльвира Сурабалдиева шайлоону өткөргөн мекемелерди өтө катуу сынга албоого чакырды. "Шайлоо менен референдумга аз шайлоочу келди, анткени партияларга болгон элдин ишеними төмөн. Биз парламентте бири-бирибиз менен кырылышып, урушуп, ишенимди жоготуп алдык. Ооба, шайлоодо кемчиликтер болду, техника бузулуп жатты, бирок биометриканы биринчи жолу киргизип жатабыз", - деди депутат.

Мамлекеттик каттоо кызматынын төрагасы Тайырбек Сарпашев шайлоодо болгон кемчиликтердин үстүнөн иштеген комиссия түзүлгөнүн айтты. "Анча-мынча мүчүлүштүктөр болгону менен, шайлоонун жалпы жыйынтыгына өтө деле таасирин тийгизген жок", - деп билдирди Сарпашев.

Автор: Нургазы Аматов