Башкы прокуратура Мухтар Аблязовдун билдирүүсү боюнча УКМКга кайрылды

Кыргыз Республикасынын Башкы прокуратурасы казакстандык олигарх Мухтар Аблязовдун билдирүүсү боюнча Улуттук коопсуздук мамлекеттик комитетине кайрылды. УКМК ал билдирүүдө айтылгандарды иликтеп чыкмакчы. Бул тууралуу 15-декабрда Башкы прокуратуранын басма сөз кызматы билдирди.

Белгилей кетсек, Аблязов жакында франциялык басылмалардын бирине маек берип, анда 2005-жылы Кыргыз Республикасындагы революцияны каржылаганын айткан.

Казакстандын мурунку энергетика министри Мухтар Аблязов 2009-жылы өз өлкөсүнөн чыгып кеткен. Ал Казакстанда каржылык махинация иштери боюнча айыпталып, соттук иликтөөлөр башталары менен ага эл аралык издөө жарыяланган. 2011-жылдан 2012-жылга чейин Улуу Британияда баш калкалап, 2013-жылы 31-июлда Франциянын Ницца шаарынан кармалган. Бирок Франция өлкөлөр ортосунда тийиштүү макулдашуу жоктугун жүйө келтирип, аны Казакстанга өткөрүп бербей келет.

Автор: Автандил Добулбеков