Жалал-Абад. Таш-Булак айыл аймагында жер мыйзамын одоно бузуу боюнча кылмыш иши козголду

Жалал-Абад облусундагы Таш-Булак айыл аймагында жер мыйзамын одоно бузуу боюнча кылмыш иши козголду. Бул тууралуу бүгүн, 16-декабрда Башкы прокуратуранын басма сөз кызматы билдирди.

Маалыматка караганда, Сузак райондук кыймылсыз мүлккө болгон укукту каттоо жерге жайгаштыруу боюнча башкармалыгынын кызмат адамдары расмий катталган маалыматтарга мыйзамсыз өзгөртүү киргизишкен. Мындан улам Таш-Булак айыл аймагынын жашоочулары 36 гектардан ашык айыл чарбага керектүү жерге болгон укугунан ажырап калышкан. Ошондой эле Таш-Булак айыл аймагынын, Кыймылсыз мүлккө болгон укукту каттоо жерге жайгаштыруу боюнча башкармалыгынын жана Архитектура, курулуш башкармалыгынын кызмат адамдары ич ара сүйлөшүп алышып, 2,58 гектар жер тилкесин жеке курулуш үчүн 43 жаранга мыйзамсыз сатышкан. Учурда "алдамчылык", "кызматтык жасалмачылык", "кызмат абалынан пайдалануу" жана "жер мыйзамын бузуу" беренелери боюнча кылмыш иши козголуп, тергөө амалдары жүрүүдө.

Автор: Бекжан Рыскулов