Өкмөт "Бишкек машина куруу заводу" ачык акционердик коомуна Салык кызматынын алдындагы карыздан кутулууну буйруду

Вице-премьер-министр Жеңиш Разаков кечээ, 21-декабрда "Бишкек машина куруу заводу" ачык акционердик коомуна барды. Өкмөттүн басма сөз кызматынан кабарлашкандай, анда Разаков мекеменин ишмердүүлүгү менен таанышып, заводдун аймагындагы өндүрүш цехтерин көрдү.

"Бишкек машина куруу заводунун" жетекчилиги вице-премьер-министрге чыгарылган продукцияларды көрсөтүп, заводдун азыркы абалы жана өндүрүштөгү финансылык кыйынчылыктар тууралуу маалымат берди. Вие-премьер-министр: "Заводдо өндүрүштүн көлөмүн арттырууга чоң ресурстар бар. Бардык өндүрүш кубаттуулугун толук иштеткенде кошумча жумуш орундары түзүлүп, салыктардын түшүүсү көбөймөк. Бул, албетте, өлкөнүн экономикасына оң таасир тийгизет", - деди.

Буга катар ал тийиштүү мамлекеттик орган жетекчилери менен ыкчам жыйын өткөрүп, ишкананын ишмердүүлүгүн жандандыруу жана өнүктүрүү боюнча сунуштарды иштеп чыгуу боюнча ведомстволор аралык жумушчу тобун түзүүнү тапшырды. Социалдык фонддун жана Мамлекеттик салык кызматынын алдындагы карызын жоюу, ошондой эле аны өнүктүрүү үчүн инвестицияларды тартуу боюнча сунуш киргизүү тапшырылды.

Автор: Максат Кудайбердиев
Фото: Өкмөттүн басма сөз кызматы