Аламүдүн районунда "жергиликтүү тургунду сабап, акчасын жана уюлдук телефонун алып кеткен" деп шектелген эки жаран кармалды

Аламүдүн районунда "жергиликтүү тургунду сабап, акчасын жана уюлдук телефонун алып кеткен" деп шектелген эки жаран кармалды. Бул тууралуу бүгүн, 10-январда Чүй облустук ички иштер башкы башкармалыгынын басма сөз кызматы билдирди.

Маалыматка караганда, окуя үстүбүздөгү жылдын 8-январь күнү саат 21:00 чамасында болгон. Анда Лебединовка айылынын жашоочусу, 28 жаштагы тургундун үйүнө бет капчан эки белгисиз адам кирип, ур-токмокко алган. Андан соң акчасын жана уюлдук телефонун алып, из жашырып кетишкен. Бул боюнча ыкчам издөө иштери жүрүп, кылмышка шектүү катары 1981-жылы туулган Б.Е. жана 1997-жылы туулган М.В. кармалган. Иликтөөдө шектүүнүн бири жабырлануучу менен бирге жашаган аялдын мурдагы күйөөсү экендиги аныкталган. Учурда кылмыш иши козголуп, тергөө амалдары жүрүп жатат.

Автор: Бекжан Рыскулов