Баткен шаарында Өрткө каршы бөлүктүн жаңы имараты ачылды

Бүгүн, 13-январда Баткен шаарында Кыргыз Республикасынын Өзгөчө кырдаалдар министрлигине караштуу Мамлекеттик өрткө каршы кызмат агенттигинин Баткен облустук өрт коопсуздук башкармалыгынын 26-аскерлештирилген өрткө каршы бөлүгүнүн административдик имарат-комплексинин ачылышы болуп өттү. Бул тууралуу Өзгөчө кырдаалдар министрлигинин басма сөз кызматы кабарлады.

Маалыматка ылайык, ага Сооронбай Жээнбеков, Өзгөчө кырдаалдар министри, генерал-майор Кубатбек Боронов катышкан. Имараттын курулушу аэропортко жакын жерде 2013-жылы башталган.

"Жаңы салынган өрткө каршы бөлүктүн имараты 2 кабаттуу болуп, 1-кабатында техниктин, диспетчердин иш бөлмөлөрү жана 4 атайын өрт өчүрүүчү автоунаалар туруучу бокс, күжүрмөн эсептин окуу классы, эс алуу, чечинип-кийинүүчү, ашкана жана тамактануучу, душ, автоунаалардын тетиктерин оңдоочу, өрт өчүрүүдө кийүүчү кийимдерди кургатуучу бөлмөлөр, ажаткана бар, ал эми 2-кабатында башкармалыктын жана бөлүмдөрдүн иш бөлмөлөрү жайгашкан. Имарат толугу менен жылытуу системи менен камсыздалган", - деп айтылат маалыматта.

Ошондой эле комплекстин короосунда атайын булганыч сууларды топтоо үчүн септик курулган жана керектелүүчү таза сууну шаардагы түтүктөргө кошууга чейинки иштер бүткөрүлгөн.

Автор: Үмүт Абдраимова
Фото: ӨКМнын басма сөз кызматы