Ыйман, адеп жана маданият жылына даярдык көрүү боюнча уюштуруу комитети түзүлдү

Ыйман, адеп жана маданият жылына даярдык көрүү жана аны өткөрүү боюнча уюштуруу комитети түзүлдү. Тийиштүү буйрукка бүгүн, 19-январда премьер-министр Сооронбай Жээнбеков кол койгонун өкмөттүн басма сөз кызматы билдирди.

Маалыматка ылайык, аталган уюштуруу комитети президенттин “2017-жылды Ыйман, адеп жана маданият жылы деп жарыялоо жөнүндө” жарлыгын аткаруу үчүн түзүлгөн. Уюштуруу комитетине 5-февралга чейин иш-чараларга даярдык көрүү жана аны өткөрүү боюнча планды иштеп чыгуу жана бекитүү тапшырылат.

Белгиленгендей, иш-чараларды өткөрүүгө байланыштуу чыгымдар ишке тартылган мамлекеттик орган жана уюмдардын бекитилген бюджетинин чегинде, ошондой эле тартылган каражаттардын эсебинен ишке ашырылат.

Аталган уюштуруу комитетин премьер-министр Сооронбай Жээнбеков жетектейт.

Автор: Жылдыз Джускембаева