ЖЫЛНААМА, 30-ЯНВАРЬ: 28 жыл мурун атактуу акын, котормочу Турар Кожомбердиев көз жумган

Мындан 28 жыл мурун, 1989-жылы 30-январда акын, котормочу Турар Кожомбердиев 48 жашында көз жумган. Ал 1941-жылы 22-июнда Чүй облусуна караштуу Жайыл районунун Сары-Булак кыштагында туулган. 1966-жылы Кыргыз мамлекеттик университетинин филология факультетин бүтүргөн. 1965-1966-жылдары "Кыргызстан пионери" гезитинде адабий кызматкер, 1969-жылдан баштап "Кыргызстан" басмасында редактор, 1976-жылдан тарта Кыргыз ССРинин Маданият министрлигинин аппаратында иштеген.

Т.Кожомбердиевдин чыгармачылык жолу 1959-жылы "Мугалимдер гезитине" жарыяланган "Мугалимге" аттуу биринчи ыры менен башталган. Ошондон тартып анын ыр, поэмалары гезит-журналдардын беттерине басыла баштаган. Алгачкы ырлар жыйнагы 1961-жылы "Көлчүктөгү ай" деген ат менен жарык көргөн. 1967-жылы Молдавия ССРинде ачылган жаш акындардын Бүткүл союздук биринчи фестивалынын, 1970-жылы Горький шаарында, 1972-жылы Казань шаарында өткөн Бүткүл союздук фестивалынын, 1972-1973-жылдары Красноярский крайындагы совет адабиятынын күндөрүнүн жана 1971-1972-жылдары кыргыз адабиятынын Украина менен РСФСРда өткөн декадасынын катышуучусу. Акындын балдар үчүн жазылган китептеринин айрымдары Москвалык басылмалардан жарык көргөн. Анын айрым ырлары орус, украин, казак, беларусь, молдован, азербайжан, литва, латыш, өзбек, татар, хакас жана француз, англис тилдерине которулган.

Турар Кожомбердиевдин 70тен ашуун ырларына обон жазылган. Калый Молдобасанов менен бирдикте "Саманчынын жолу" аттуу балет-ораториясындагы ораториянын текстин, "Гүлдө, Кыргызстан", "Шаңдан, мекен" аттуу кантаталардын текстин, Мукаш Абдраев менен бирдикте "Лирикалык хороводдун", Таштан Эрматов менен бирдикте "Элүү жылда элим жаңырды" аттуу кантаталардын ырларын жазган. 1970-жылы Турар Кожомбердиевге "Кызыл алма" жана "Таңкы симфония" аттуу ырлар жыйнагы үчүн Кыргызстан Ленин комсомолу сыйлыгы ыйгарылган. Ал Украина ССРинин жана Пенза обком партиясынын Ардак грамоталары менен сыйланган.

30-январга карата жылнаама.

Автор: Саадат Токтоболот кызы