Аргентинада 2 миңдей адам дүйнөлүк рекорд коюу үчүн сууда тизилди

Сууда тизилип сүзгөндөрдүн саны боюнча дүйнөлүк рекорд коюу үчүн Аргентинанын Буэнос-Айрес шаарынын 2 миңдей тургуну сууга түшүп тизилди. Бул тууралуу бүгүн, 30-январда "РИА-Новости" басылмасы жазып чыкты.

Иш-чарага жалпысынан 1941 адам катышкан. Алар бири-бирин колдон алып, суу үстүндө калкып турушкан. Муну менен сүзүүчүлөр буга чейинки 2014-жылы Тайванда болгон ушул сыяктуу акцияны ашып өтүүнү көздөшкөн. "Guinness World Record" басылмасынын маалыматына таянсак, анда ал акцияга 634 адам катышкан.

Ар бир катышуучунун төшүнө атайын номер чапталып, жанындагы сүзүүчүнү кармоону өтүнүшкөн. Даярдыктар бүткөндө уюштуруучулар дрондун жардамы менен видео тартып калышкан.

Алардын айтымында, бул иш-чара расмий түрдө катталышы үчүн 2 айдай кетет.

Автор: Үмүт Абдраимова
Фото: Интернеттен алынды