Темир Сариев: "ЕАЭБге киргенибиз туура саясий чечим болгон"

Бүгүн, 4-февралда Бишкекте "Ак шумкар" саясий партиясынын жыйыны өтүүдө. Ага өлкөнүн бардык облустарынан жана борбор калаадан шайланып келген 200 делегат катышып жатат.

Анын жүрүшүндө партия лидери Темир Сариев Кыргыз өлкөсүнүн Евразиялык экономикалык биримдикке кирүүсү тууралуу пикирин айтты. "ЕАЭБге киргенибиз туура саясий чечим болгон. Биз эң ыңгайлуу шарттарда кирдик. Бул биримдикке кирүү боюнча сүйлөшүүлөргө киришкем, кээ бирлерин өзүм жетектегем. Болбой турган жеңилдиктерди, шарттарды алдык. 200 миллион доллар грант алдык. Кыргыз-Орусия фонду түзүлүп, ага 500 миллион доллар бөлүнгөн. Ооба, кыйынчылыктар бар, бирок бул кыйынчылыктарды жеңишибиз керек. Коюлган талаптарга жооп берген өзүбүз өндүргөн продукцияларды Орусиядагы, Казакстандагы базарларга чыгарууга мүмкүнчүлүк ачылды. Эгер ЕАЭБге кирбесек, мындай мүмкүнчүлүк болбойт эле. Убакыт өтөт, эл ЕАЭБге кирүү туура чечим экенин түшүнө баштайт", - деди Сариев.

Автор: Нургазы Аматов
Фото: Нургазы Аматов