Бекжан Супаналиев президенттик аппараттын социалдык өнүктүрүү бөлүмүнүн башчысы болуп дайындалды

Бекжан Супаналиев Кыргыз Республикасынын Президентинин Аппаратынын социалдык өнүктүрүү, тарых жана маданият маселелери боюнча бөлүмүнүн башчысы болуп дайындалды. Тийиштүү жарлыкка мамлекет башчы Алмазбек Атамбаев кол койгон. Бул тууралуу 14-февралда президенттин басма сөз кызматы билдирди.

Супаланиев Бекжан Төрөбаевич 1977-жылы 11-июлда Чүй облусуна караштуу Токмок шаарында төрөлгөн. 2011-2012-жылдары президенттик аппараттын аймактык өнүктүрүү жана мониторинг бөлүм башчысынын орун басары болгон.

2012-2014-жылдары Өкмөт аппаратынын уюштуруу-инспектордук иштер жана жергиликтүү өзүн-өзү башкаруу бөлүмүнө караштуу жергиликтүү өзүн-өзү башкаруу секторунун эксперти, 2014-2015-жылдары өкмөттүн өнүктүрүү, транспорт, курулуш жана коммуникациялар бөлүмүнүн эксперти, 2015-2016-жылдары өкмөттүк аппараттын уюштуруу-инспектордук иштер жана жергиликтүү өзүн-өзү башкаруу бөлүмүнүн инспектору болуп иштеген.

2016-жылдын апрель айынан тартып Кыргыз Республикасынын Өкмөтүнүн Аппаратынын билим берүү, маданият жана спорт бөлүмүнүн башчысы болуп иштеп келген.

Автор: Айпери Ганыжан кызы