ӨКМ: "Өлкө аймагында жума ичинде айрым жерлерде катуу кар жаап, суук болушу күтүлөт"

Өлкө аймагында жума ичинде абанын температурасы төмөндөп, суук болот. Бул тууралуу бүгүн, 15-февралда ӨКМнын басма сөз кызматынан билдиришти.

"18-19-февралда мезгил-мезгили менен кар жаашы, айрым жерлерде катуу жаашы күтүлөт. Зымдарга жана бактарга суу кар жармашат. Жолдор тайгак жана тоңголок болуп, тоолуу аймактарда кар күрткүсү күтүлөт. Батыштан соккон шамалдын ылдамдыгы секундасына 15-20 метрге жетиши мүмкүн", - деп билдирди басма сөз кызматы.

Маалыматка ылайык, 20-21-февралда абанын температурасы төмөндөп түнкүсүн Чүй өрөөнүндө -8-13, Сокулук районунда жана Талас өрөөнүндө түнкүсүн -10-15 градуска жетет. Күндүз -2-7. Ал эми Ош, Жалал-Абад, Баткен облустарынын дыйканчылык аймактарында түнкүсүн -5-10, күндүз -5 градус суук болот. Ысык-Көл ойдуңунда түнкүсүн -8-13, күндүз -2-7 градус суук, Нарын облусунун тоолуу райондорунда түнкүсүн -20-25, күндүз -11-16 градус суук болушу күтүлөт.

Автор: Акназар Сулайманкулов
Фото: Интернеттен алынды