Владимир Путиндин Бишкекке сапары үзгүлтүккө учурабайт

Бишкекте депутат Өмүрбек Текебаевдин кармалышы боюнча өтүп жаткан митингдерден улам Орусия президенти Владимир Путиндин Бишкекке сапары үзгүлтүккө учурабайт. Бул тууралуу 27-февралда президенттик аппараттан билдиришти. Путин Кыргыз жерине эртең, 28-февралда келери күтүлүүдө.

Эскерте кетсек, "Ата Мекендин" лидери Өмүрбек Текебаевге 25-февралда Башкы прокуратура тарабынан кылмыш иши козголду. Депутат "коррупция", "алдамчылык" беренелери боюнча күнөөлөнүүдө. Орусиялык ишкер "Текебаев 2010-жылы менден 1 миллион доллар алган" деп көрсөтмө берген. Европадан Бишкекке Стамбул аркылуу учуп келген Текебаев 26-февралда "Манас" аэропортунан УКМК кызматкерлери тарабынан кармалып, 48 саатка камакка алынган.

Эки күндөн бери Бишкекте жана республика аймактарында Текебаевдин тарапташтары митингдерди өткөрүп жатышат. Чогулгандар Текебаевди тезинен бошотууну талап кылышууда.

Автор: Автандил Добулбеков