Алмазбек Атамбаев ЕАЭБдин көйгөйлөрү жыл аягына чейин чечилерин айтты

ЕАЭБдин калган көйгөйлөрү жыл аягына чейин чечилет. Бул тууралуу 28-февралда "Ала-Арча" мамлекеттик резиденциясында президент Алмазбек Атамбаев билдирди. Президент уюмдун алкагында Орусия Кыргыз мамлекетине көп жардам бергенин айтып, уставдык капиталы 500 миллион долларды түзгөн Кыргыз-Орусиялык өнүктүрүү фондун мисал кылды.

"Кыргыз мамлекети менен Орусия мындан ары да стратегиялык өнөктөш бойдон кала берет. Орусия президентинин саясий эрки менен уставдык капиталы 500 миллион долларды түзгөн Кыргыз-орус өнүктүрүү фонду түзүлдү. Орус тарап интеграциялык процесстин алкагында техникалык жардам иретинде 200 миллион доллар бөлдү. Ар кандай имиш, ушактарга карабай ЕАЭБге киргенибиз эң туура кадам болду", - деди Атамбаев.

Путин Орусия быйыл ЕАЭБге төрагалык кыларын, жыл ичинде Кыргыз мамлекети ЕАЭБдин шартына ылайыкташуусуна жардам берерин айтты. Сөз арасында Кыргыз Республикасынын ЕАЭБге кириши кыйын болгонун, Атамбаев улуттук кызыкчылыкты коргоодо катуу турганын да белгиледи.

Резиденцияда Кыргыз Республикасынын президенти Алмазбек Атамбаев менен Орусия президенти Владимир Путиндин жолугушуусу өтүүдө.

Автор: Автандил Добулбеков
Фото: Султан Досалиев