ИИМдин мурдагы кызматкери Камчы Көлбаев тааныштырган адам алдап кеткенин айтты

“Көп жылдан бери Камчы Көлбаевди тааныйм. 24-марттагы революцияга чейин ИИМде подполковник болуп иштегем. Кийин иштен бошотулдум, буга байланыштуу жеке бизнес баштоону чечтим. Көлбаев менен Бишкектеги ресторандардын биринен таанышып, ага тамеки бизнеси менен иштеп жатканымды айтып, бул тармакта тааныштары бар болсо, мени менен иштешүү сунушун айттым. Мындан улам Камчы Көлбаев мени Медер Кожакметов аттуу адам менен тааныштырды".

Бул маалыматты бүгүн, 2-майда кримавторитет Камчы Көлбаев боюнча өтүп жаткан сотто күбө Арсен Садыбакасов айтты. Көлбаев тааныштырган адам менен андан аркы мамилеси кандай улангандыгы тууралуу төмөндөгүлөрдү билдирди:

"Кожакметов менен кийин бир нече жолу жолуктук. Бир күнү ал менин кылган ишиме канааттанганын айтып, тамеки өндүрүшүн сатып аларын айтты. Ошентип, 2011-жылы менден 340 миң долларлык даяр тамеки товарын сатып алды. Акчасын 1 айдын ичинде берерин билдирген болчу, бирок ушул кезге чейин аталган сумманын 150 миң долларын бере элек. Бирок мен эч кандай чара көргөн жокмун. Көлбаевге да кайрылган жокмун. Анткени келишимди Кожакметов менен түзгөм",- деди күбө.

Автор: Мээрим Жеңишбек кызы