Аида Салянова Өмүркуловго: "Текебаев менен чогуу келе жатып эмнеге качып кеттиңиз?"

Депутат Аида Салянова кесиптеши Иса Өмүркуловдон Европага Өмүрбек Текебаев менен чогуу барып, кайтканда эмне үчүн бөлөк келгенин сурады. "Австриядан келе жатып Текебаев менен эмне үчүн чогуу келген жоксуз, эмнеге качтыңыз?" - деди Салянова.

Өмүркулов эмнеге өзүнчө келгенин түшүндүрдү. "Мен Австриядан бир күн мурун кайттым, Москва аркылуу келдим. УКМК жана Башкы прокуратура менен кеңешкен жокмун. Бул ишке эч кандай тиешеси жок", - деди Өмүркулов.

Эскерте кетсек, "Ата Мекендин" лидери Өмүрбек Текебаевге 25-февралда Башкы прокуратура тарабынан кылмыш иши козголду. Депутат "коррупция", "алдамчылык" беренелери боюнча күнөөлөнүүдө. Орусиялык ишкер "Текебаев 2010-жылы менден 1 миллион доллар алган" деп көрсөтмө берген. Европадан Бишкекке Стамбул аркылуу учуп келген Текебаев 26-февралда "Манас" аэропортунан УКМКнын кызматкерлери тарабынан кармалып, 27-февралда Бишкектин Биринчи Май райондук сотунун чечими менен 2 айга камакка алынган.

Автор: Автандил Добулбеков