СУПЕРСТАН: "Күйөөм келбей коёбу деп корком"

СУПЕРСТАН: "Күйөөм келбей коёбу деп корком"

SUPER.KG порталынын "Суперстан" бөлүмүндө "Күйөөм келбей коёбу деп корком" деген тема талкууга алынды.

Темадагы автордун билдирүүсү: "Турмушка чыкканыма 2 жыл болду, тилекке каршы, балалуу боло албай жатабыз. Жолдошум 1-курсту бүткөндө эле ала качып кетип, кайнатамдар окутабыз дешкен. Бирок бюджеттик негиздеги окуумду келишимдик негизде сырттан окуу бөлүмүнө котортуп коюшту. Учурда 3-курсмун, эми кайын журтум "окубайсың" деп окуумдун акчасын төлөбөй жатышат. Акчасы жок дейин десем, бай жашашат. Анан да дарыгерге көрүнүп, балалуу болуу аракетин көрөйүн десем кайненем "бекер эле убара болуп акчаны коротуп жатасың, сен төрөбөйсүң" деп жанымды кейитти. Жолдошума айтсам, ал акчасы жок экенин айтты. Жиним келип ата-энеме чалып ыйласам, апам "үйгө кел, окууңдун акчасын биз төлөйбүз" деди эле төркүнүмө кетип калдым. Жолдошум чалып, эмнеге айтпай кетип калдың, андай болсо таптакыр келбе" деп телефонду өчүрүп койду".

Темадагы билдирүүлөрдөн:

"Күйөөңө кайра бар, бир окуу деп тагдырыңды талкалап алба. Окууңдан азырынча академиялык өргүү алып тур, убагы келгенде алдап-соолап бүтүрүп аласың. Өзүңдү жылуу карма, дарылан, жашап кетүүгө аракет кыл. Мени да "окууңду бүтүрөбүз" деп ала качып кетишкен, кайдан, эч нерседен жок калдым, ишим да бар болчу, ажырашып тындык, эми болсо окугум да келбейт".

"Үй-бүлөңдү сактап кал, күйөөң менен сүйлөшүп көр, негизи дарыгерге көрүнүшүң керек, сабырдуу бол".

"Ушунчалык жеңил ойлойбуз жашоону. Апаң сени үйгө чакырбаш керек болчу. Эң негизгиси ката жана ажырашуунун көбөйүшүнө себепчи ата-энелер өздөрү".

"Келет, болгону 3 күн эле болуптур го. Аялын кетирип коюп өзүн бойдок сезип кыйын болуп жатат да. Сагынганда кайрылат кайра".

"Жаш экенсиңер, көргөндөн көрө элегиңер көп. Анан жашабай жатып эле ажырашканыңар туура болбойт. Адамга эң негизгиси өмүрлүк жар керек. Сенин сурабай эле кетип калганың эң чоң катачылык. Миң урушуп-талашканда деле бир ооз сурап кетүү керек. Болор иш болду, кичине сабыр кылып күйөөңдү күт. Бир жума, он күндөй күт, эгер келбесе, чалбаса, анан акырын СМС жазып кой: "Сиз мени сүйбөйт окшойсуз, ээ?" деген сыяктуу сөздөр менен. Бул күйөөңдүн жүрөгүн жибитет, анан ойлонот, "кой эми, бул менин аялым, сүйүктүүм" деп".

"2 жыл аз эле убакыт го. Кээ бирлер 10 жыл күтүп, балалуу болуп жатышпайбы. Адамдар кызык эле, курбум да турмушка чыкканына эми 8 ай болуп, "боюмда болбой жатат" деп ыйлактап жүрдү эле. Тийгенде эле шарт болушу керек, болбосо эле төрөбөскө чыгарып коюшат. Кайра барсам тигинтип сүйлөшөт дебей эле барыңыз! Күнөө өзүңүздө, күйөөңүз сизге ким? Кеңешпейсизби, ушундай болду деп, апаңызга чалып ыйлактабай. Андан башкасын элестете албасаңыз, сабыр кылганга үйрөнүңүз да".

Талкууга кошулгуңуз келсе, бул жакка кириңиз.

Автор: Гулийпа Маметосмон кызы
Фото: Интернеттен алынган сүрөт

16:43 06-03-2017

РУБРИКАДАГЫ СОҢКУ КАБАРЛАР