Депутат: "Дыйкандарга 7 пайыздык насыя берүү популисттик мыйзам долбоору болуп калды"

"Дыйкандарга 7 пайыздык насыя берүү популисттик мыйзам долбоору болуп калды", - деген пикирин бүгүн, 14-апрелде журналисттерге Жогорку Кеңештин "Өнүгүү-Прогресс" фракциясынын депутаты Зиядин Жамалдинов билдирди.

Депутаттын айтымында, журналисттер ал тууралуу "дыйкандарга 7 пайыз төлөм менен насыя берүүгө каршы экен" деп жазып жатышат. "Массалык маалымат каражаттарынын өкүлдөрү мени дыйкандарга жаман көрсөтүүдө. Мен 7 пайыз эмес, андан төмөн 3-2 пайыз менен насыя бергенди колдойм. Бул мыйзам долбоордун кереги жок болчу. Популисттик мыйзам долбоору болду. Азыр деле мындай мыйзам долбоору жок деле 10 пайыз менен насыя берилүүдө. Мен буга каршы болгонумдун себебин айтып берейин. 13 миң дыйканга насыя беребиз деп, бюджетке 1 миллиард сом зыян келтирип жатабыз. Аталган сумма коммерциялык банкттарга түшөт. Мындай каражатка 1 миң трактор алып, бир айыл аймакка 2ден трактор алып берсе болот. 13 миң адамга насыя берген жакшыбы же трактор алган жакшыбы?" - деп түшүндүрдү Жамалдинов.

Эске салсак, “Республика-Ата Журт” фракциясынын депутаттары демилгелеп чыгып, Жогорку Кеӊеш “Кыргыз Республикасынын айыл чарбасын өнүктүрүү жөнүндө” мыйзам кабыл алган. Мыйзамда дыйкандарга 7 пайыздык насыя берүү жагы каралууда.

Автор: Жылдыз Джускембаева
Фото: Жылдыз Джускембаева