Казакстанда 48 жаштагы жаран 6 жаштагы кызды зордуктоого аракет кылып жаткан жеринен кармалды

Казакстандын Астана шаарынын четинде 48 жаштагы жаран 6 жаштагы кызды зордуктоого аракет кылып жаткан жеринен кармалды. Маалыматка караганда, шектүү өспүрүм кызды чөптүн арасына, бадалдын түбүнө алып барып чечинтүүгө үлгүргөн. Кыздын бактысына жараша бул убакта жолдон өтүп бара жаткан куруучулар анын кара ниетин байкап калышкан.

6 жаштагы кызды зордуктоого аракет кылган жаранды кармаган куруучу Аскар Кажигумаровдун айтымында, шектүү ошол учурда мас абалда болгон.

"Мен андан эмне үчүн бул кадамга барганын сурадым. Көрсө, бул жаран кыздын ата-энеси менен жакын тааныштардан экен. Чогуу ичимдик ичип мас болушуптур, андан кийин өспүрүмгө балмуздак алып берүү үчүн көчөгө ээрчитип чыккан. Жолдон жаман ой келип, аны чөптүн арасынан ишке ашыруу үчүн кызды ээрчитип келген", - дейт Аскар Кажигумаров.

Видеодо куруучулар кармалган жаранды ачууланып тилдеп, уруп да жатышат. Алар полиция чакырып шектүүнү өткөрүп беришкен. Астана шаардык ички иштер департаментинин маалымат катчысынын айтымында, кармалган жаран буга чейин да соттолгон, азыр ал убактылуу кармоочу жайда.

Видео социалдык тармактарга тарап, айрымдар куруучулардын аракеттерине баа берүүдө. "Алар ачуу үстүндө педофилди сабагандыгы үчүн жоопко тартылышат" деген пикирлер да айтылууда.