ЖЫЛНААМА, 8-МАЙ: Белгилүү испаниялык ырчы Энрике Иглесиас 42 жашка толду

Анна Курникова

Ырчы сүйүктүүсү Анна Курникова менен

Бүгүн, 8-майда атактуу испан ырчысы Энрике Иглесиас 42 жашка толду. Ал Испаниянын борбору Мадрид шаарында туулган. Атасы белгилүү ырчы Хулио Иглесиас, апасы – испаниялык журналист, белгилүү телеалпаруучу Изабель Прейслер. 1979-жылы атасы Хулио менен апасы Изабель Энрике 4 жаш курагында ажырашып кетишип, ырчы атасы менен Американын Майами шаарына кетет. 1995-жылы Энрикенин алгачкы испан тилиндеги "Энрике Иглесиас" аттуу альбому жарыкка чыккан. Бул жыйнак эл жүрөгүнөн орун таап, чыккандан кийинки алгачкы бир жумада эле жарым миллион даанада сатылууга жетишкен. Альбомдогу "Сени сүйүү үчүн" деген ыры хитке айланып, Мексиканын "Марисоль" телесериалына саундтрек кылып алынган. Ушул иши үчүн "Эң мыкты латын артисти" наамы менен "Грэмми" сыйлыгына ээ болгон.

Эки жылдан кийин “Жашоо” деген аталышта Энрикенин экинчи альбому чыгат. Популярдуулукту багындырган ырчы жигит Энрике ушундан кийин мыкты даярдалган концерттик программасы менен дүйнөгө сапар тартат. Кичинекей кезинен эле испан, англис жана португал тилдерин жакшы билген Энрике англис тилинде ырдай баштаган. Бир аз убакыттан кийин атасы Хулио Иглесиас жана Луис Мигельдер менен бирге “Сүйүктүү латын артисти” наамына ат салышкан. Бул жолу атасына орун бошотуп бергени менен, кийин ушул эле наамдын үч жолку ээси болууга жетишкен. Бир жылдан кийин кайра испан тилинде “Сүйүү куралдары” деген аталыштагы, дагы бир жыл өтпөй англис тилинде “Энрике” альбомдору сатыкка чыгат. Андагы “Бийлөө” ыры дүйнөлүк хит-параддан биринчи орунга ээ болгон.

Ошентип атактуулукту багындырган Энрике Уитни Хьюстон жана орусиялык ырчы Алсу менен ырдаган дуэттери камтылган "Качуу" альбомун чыгарат. 2001-жылы чыккан бул жыйнак дүйнөлүк рекорддордун баарын багындырып, андагы хит ырлары менен 16 өлкөдө 50 концерт коюуга жетишет. Кийин дагы бир "Грэмми" сыйлыгын алып келген испан тилиндеги "Мүмкүн" альбому болгон.

Жеке жашоосу:

Ырчы 15 жылдай убакыттан бери орусиялык теннисчи Анна Курникова менен сүйүү мамилесин куруп келет. Ал эми журналисттердин "качан мамилеӊер тойго жетет?" деген суроолоруна ырчы: "Мамиледе эӊ негизгиси сый жана сүйүү болуусу зарыл. Паспорттогу штамп эч нерсени өзгөртпөйт. Мени расмий никеден да, ата болуу көбүрөөк кызыктырат", - деген жоопту берип келет.

Автор: Турсунай Алымкулова