Кадамжай райондук агрардык өнүктүрүү башкармалыгы: "Быйыл гилас 700 гектардан ашуун жерде өстүрүлүүдө"

Кадамжай районунда 700 гектарга жакын жерден гиластын түшүмү алынып, ички базарларга сатылат. Мындай маалыматты бүгүн, 13-майда SUPER.KG порталына Кадамжай райондук агрардык өнүктүрүү башкармалыгынын башчысы Айдар Асамидинов билдирди.

"Кадамжай районунда 3 түрдүү гилас бар. Учурда эрте бышуучу түрү бышып калды. Чарбагерлерибиз район боюнча 700 гектардан ашуун жерде гиласты өстүрүшөт. Жыл сайын 2 миң тоннадан ашык гилас түшүмү жыйналат. Учурда 1 килограмм гилас 150 сомдон сатылууда. Өткөн жылы жаңы бышканда баасы 80 сомго чыккан. Бул жылы баасы жогору болууда. Айрым мүмкүнчүлүгү бар соодагерлер борбор калаадагы базарларга алып чыгып сатат. Кээ бир жеке ишкерлер жакынкы Казакстан, Орусия өлкөлөрүнө экспорттошот", - деп билдирди Асамидинов.

Эске салсак, буга чейин окурман "Элдик кабарга" Кадамжай районунда гилас бышып баштаганын билдирген.

Автор: Акназар Сулайманкулов
Фото: Окурманга таандык