Канн кинофестивалында 5 кыргыз тасмасы көрсөтүлөт

"Кыргыз-казак бир тууган. Путешествие с бомбой" тасмасы

"Мунабия" тасмасы

"Саякбай" тасмасы

"Апамды издеп" тасмасынан кадр

Канн кинофестивалында кыргыздардын 5 тасмасы көрсөтүлөт. Бул тууралуу Маданият, маалымат жана туризм министрлигинин алдындагы кинематография департаментинен кабарлашты.

Маалыматка ылайык, Канн фестивалында "Kazakhstan Cinema" компаниясынын стенди да орун алат. Бул компания 2016-жылы казак кинолорун жайылтуу максатында түзүлгөн. Ал казак тасмалары менен эле чектелбей, тажик жана кыргыз тасмаларын да көрсөтөт. "Kazakhstan Cinema" компаниясы бул фестивалга алгачкы жолу катышып, Орто Азия тасмаларын аталган фестивалга алып чыгып жаткан биринчи компания.

Бул абройлуу эл аралык кино аянтында кыргыздын атынан көрсөтүлө турган тасмалар:

Руслан Акун режиссёрлук кылган "Апамды издеп", Таалайбек Кулмандаев тарткан "Мунабия", Бакыт Мукулдун "Атанын керээзи", Нурлан Абдыкадыровдун "Кыргыз-казак бир тууган" жана Эрнест Абдыжапаровдун "Саякбай" кино тасмалары.

Андан сырткары аталган маалыматта, стенддин жүрүшүндө кино ишмердиги менен алектенген эл аралык кино аренасындагы көрүнүктүү адамдар менен сүйлөшүүлөр болору, Орто Азиянын киночуларынын бул аянтка катышуусу бүт дүйнө коомчулугуна Орто Азиянын чыгармачылык талантын көрсөтүүгө мыкты мүмкүнчүлүк түзүп берери да белгиленет.

Белгилей кетсек, Франциядагы Көгүлтүр жээкте 17-майда башталган фестиваль 28-майга чейин уланат.

Автор: Кенжебай Сатканалиев
Фото: Интернеттен алынды