СУПЕРСТАН: "Үйдөгүлөр урушуп-тилдесе да сөгүнгөн адатымды калтыра албай койдум"

SUPER.KG порталынын "Суперстан" бөлүмүндө "Сөгүнчөөксүңбү?" деген тема талкууга алынууда.

Темадагы билдирүүлөрдөн:

"Жолдошумдун эң жаман көргөн сапаты - кыздардын сөгүнүүсү. Кыз маалымда эч ким жокто сөгүнүп-сөгүнүп терс эмоцияларымды чыгарып алчумун. Бирок сүйгөнүң үчүн кандай гана курмандыкка барбайсың, андай "өзгөчөлүгүмдү" калтырдым.

"Негизи сөгүнбөйм деле, кээде ак ит кирип, көк ит чыгып кетет. Бир жолу инимди "ойготуп кой, эмне кылсаң да ойгот" деп коюп, ал ойготкондо уйкусурап аябай сөккөн экенмин. Эртеси эжем урушкан, ошондон кийин өзүмдү көзөмөлдөп калдым".

"Балит ооз" атыккан жаман экенин билем, бирок мен да тилимди көзөмөлдөй албайм. Өспүрүм куракта бир компаниянын таасиринен улам калган түбөлүк мурас болду. Жумушта өзүмдү тыйып жүрөм, бирок ачууланган учурда чыгып кетет. Бир сөзүмдү кесиптешим угуп калып, бети кызарып кеткен. Үйдө сөгүнөрүмдү жакшы билишет, урушушат-тилдешет, бирок баары бир".

"Мурда анча-мынча ачууга алдырып сөгүнүп коёт элем. Эмоцияны башкарууга аракет кылып жүрүп, аны менен сөгүнүү да жок. Кээде ушундай абалга алып барышат, тилиң буралып, жыга чапкың келип, ошондо жаман сөздөн бир-экөөнү айтып коём".

"Сөгүнбөйм. Урушуп калганда оозуңдан эч эле мындай сөз чыкпаса ыңгайсыз болот экен. Бир жолу айта коём деп тилим буула түшсө, карап тургандар күлүп жиберишкен, уят эле болгом".

"Шартка, чөйрөгө жараша сөгүнмөйдү болушунча унуткарууга тырышып келем. Бир жылдай мурун психологиялык китеп окуп калып, "ачууң келгенде, жылмай" дегенди сууруп чыгып, күнүмдүк жашоомо эреже кылып киргизип алгам. Албетте, парадокс, бирок жылмайып туруп жайламай жорукка аябай көнүп алдым. Учурдагы "голливуд күлкүмдүн" көбү ичинен ашатып сөгүп жатат дегенге барабар".

Талкууга кошулгуңуз келсе, бул жакка кириңиз.

Автор: Нуржанат Медетбекова
Фото: Интернеттен алынган сүрөт