Сел жүргөн аймакта калып калган туристтерге жардам көрсөтүлдү

Жалал-Абад-Казарман унаа жолунда сел калдыктары түшкөн жолдо калып калган чет элдик туристтерге куткаруучулар жардам көрсөтүштү. Мындай маалыматты бүгүн, 7-июнда Өзгөчө кырдаалдар министрлигинин басма сөз кызматынан билдиришти.

Маалыматка ылайык, Сузак районунда ушул жылдын 6-июнь күнү катуу жааган жамгырдан, Жалал-Абад-Казарман унаа жолунун 76-чакырымында жолго сел суулары менен сел калдыктары түшүп, натыйжада жол эки тарабынан тосулуп калган.

Жалал-Абаддан Нарын облусун көздөй мотоцикл менен бара жатып жолдо калган чет элдик туристтерге ӨКМнын куткаруучулары жардам көрсөтүп, жолго түшкөн сел калдыктарынан өткөрүшкөн. Жыйынтыгында алар өз багыты менен жолун улап кетишти.

Автор: Акназар Сулайманкулов
Фото: ӨКМдин басма сөз кызматы