ЖЫЛНААМА, 7-ИЮНЬ: Моюнга жоолук ороону модага киргизген Жорж Браммелл төрөлгөн

Үстүнө көк, алдына ак кийүү стили Браммеллдин заманынан бүгүнкү күнгө чейин калган стиль.

Ага арналып Англиянын көчөлөрүнө эстелик коюлуп, өмүр таржымалын чагылдырган бир нече тасмалар да бар.

Моюнга жоолук ороп жүрүүнү модага киргизген англиялык Жорж Браммелл Лондон шаарында 1778-жылы төрөлгөн. Ал чоң чиновниктин баласы болгон. Келечектеги англиялык "денди" ( "Денди" деп сырткы көрүнүшүн көзөмөлдөп жүргөн, баскан-турганы, сүйлөгөнү жагынан айырмаланган, XIX кылымдагы социалдык катмардагы маданияттуу эркек кишилерди айтышкан) падыша үй-бүлөлөрү менен алакада болуп, ханзаада Георг IV менен жакын дос болгон. Замандаштары ага "Сулуу Бреммелл" деген ат коюп алышкан. Ал жоолукту моюнга салып жүрүүнү модага киргизгенден тышкары заманбап кара костюмду галстук менен кийүүнү да модага кошкон. Ал өзү дайыма аппак көйнөк менен галстук же моюнуна жука жоолук байлап жүргөн. Ушул эле комплект менен ак же башка түстөгү жилет, ак панталон же денеге чыпташкан бриджи, кара же көк түстөгү этеги узун латун топчулары бар костюм (сюртук) жана кара ботфорт (тизеден ашкан узун өтүк) кийип жүргөн. Бара-бара бул кийинүү стили падыша жана ак сөөктөрдүн үй-бүлөлөрүнө кенен жайылып, жыл өткөн сайын заманбапташып жүрүп отурган. Ал атасынан калган мурастын баарын ырахаттанып жашоого короткон.

Азыркыга чейин этикет деп эсептелип келген нерсенин көпчүлүгүн Жорж Браммелл киргизгени айтылат. Ал бат-баттан жуунуп гигиенаны сактап, бир күндө бир нече жолу кийимин алмаштырып турган. Өзүнө кам көрүүдө денесин аттын жалынан жасалган щётка менен жууган.

1816-жылы карызга батып кетип, Англиядан Францияга качып барат. Ал жактан "Аялдар жана эркектер костюму" деген эмгегин жазган. Бирок насыячылар аны Франциядан таап кармап алышып, 1835-жылы түрмөгө кесилип кетет. Кийин аны достору акча берип куткарып алышат. Жорж Брайан Браммелл шаан-шөкөттүү жыргал жана бай жашоодон кол жууп калган соң, психикалык жактан жабыркап жыйынтыгында сифилиске кабылып оорулуу болуп калат. Ал 1838-жылы психикалык ооруканага жаткырылып, эки жылдан кийин 1840-жылы 30-мартта каза болгон.

7-июнга карата жылнаама.

Автор: Гүлжан Асанкожоева