ЖЫЛНААМА, 14-ИЮНЬ: 89 жыл мурун латын америкалык революциячы Эрнесто Че Гевара төрөлгөн

Латын америкалык революциячы, Кубанын туңгуч Өндүрүш министри, күрөштүн символу болуп калган Эрнесто Че Геваранын көзү тирүү болгондо 89 жашка чыкмак. Ал 1928-жылы 14-июнда Аргентинанын Росарио шаарында архитектордун үй-бүлөсүндө төрөлгөн.

1952-жылы жакын досу Альберто Гранадо менен Латын Америкага саякатка барган. Алар Чили, Перу, Колумбия жана Венесуэлада болушкан. 1953-жылы Буэнос-Айрестеги Улуттук университетти аяктап, дарыгердин дипломун алган.

1953-1954-жылдары кайрадан саякатка чыгып Боливия, Перу, Эквадор, Колумбия, Панама, Сальвадор мамлекеттерине барган. Кийин Мексикага келип өз кесиби боюнча иштеп баштаган.

1955-жылы Че Гевара Фидель Кастро менен таанышып, кийин анын революциялык отрядына кошулган. Эки жылдан кийин ири колоннаны башкарган. 1959-жылы революция жеңгенде Че Гевара Кубанын жарандыгын алып, саясатка аралашкан. 1965-жылы Куба мамлекетинен чыгып, Боливияда партизандар кыймылын уюштурууга киришет.

Че Гевара түзгөн партизандык отряд өкмөттүн аскерлери тарабынан курчоого алынып, 1967-жылдын 9-октябрында аны атып өлтүрүшкөн. Ал эми анын сөөгүн элдин кароосуна таштап коюшкан. Көп жылдар бою Геваранын көмүлгөн жери жашыруун болуп, арадан 30 жыл өткөндөн кийин гана сөөгү кайсы жерге көмүлгөнү билинген. 1995-жылы боливиялык армиянын генералы "Че Гевара аба майданынын учактар уча турган тилкесине катарлаш жерде өлтүрүлгөн эле жерге коюлган" деп билдирген.

Эки жылдан кийин анын дүйнөдөн кайтканынын 30 жылдыгына карата сөөгү эксгумацияланып, мекени Кубага жиберилген. Азыр анын сөөгү Че Геварынын мавзолейинде коюлган. Бирок айрымдар 1997-жылы команданттын өзүнүн сөөгү коюлганына ишенбей да келишет.

14-июнга карата жылнаама.

Автор: Айпери Ганыжан кызы