Дастан Бекешев Эсептөө палатасынын аудиторлорун азайтуу керек деген пикирде

Жогорку Кеӊештин депутаты Дастан Бекешев Кыргыз мамлекетинин Эсептөө палатасынын аудиторлорун кыскартуу сунушун айтты. Бул тууралуу депутат 15-июнда парламенттин жыйынында билдирди.

“Эсептөө палатасындагы 9 аудитор көптүк кылат. Анткени алардын айлыктары көп экен. Эсептөө палатасынын төрагасы Улукбек Марипов аудиторлор 20-25 миң сом айлык ала турганын айткан. Декларацияны карасам алардын жылдык кирешеси 1 миллион сом экен. Депутаттардын кирешесине асылып калышат, эмнеге аудиторлордукуна эч ким тийишпейт? 3 эле аудитордун мисалы жетиштүү болот”, - деди депутат.

Марипов аудиторлордун айлыгы 18 500 сом экенин айтты. Ал билдиргендей, класстык чин, тажрыйбасына ылайык каражат кошулат. Баарын кошкондо айлыктары 20 миң сомдон аша турганын кошумчалады.

Автор: Жылдыз Джускембаева